Oatcakes e creme di formadi e whisky

Cemût che o savìn ancje di Internazionalitari si è inviade la campagne pal referendum pe indipendence de Scozie: un grant risultât, che al ven dal grant lavôr fat dai indipendentiscj scozês, che cuntune evoluzion politiche durade plui di cualchi an, a àn puartât il lôr discors di un plan scuasi dome emozionâl a un plan identitari plui madûr, che al ten cont de economie, de eficience governative e v.i., dant ae int simpri plui fiducie in se stesse e tune Scozie libare.

Tornâ in Scozie in curt par me al è avonde dificil, ma si pues viazâ almancul cui savôrs. Cussì o ai metût dongje chest plat.

Pai oatcakes:

vene: 250 grams

spongje: 20 grams

aghe clipe: une tace

1 sedonute di levan chimic

sâl

Impastâ la vene (in flocs piçui se no si le cjate in farine) cu la aghe clipe (disìn ancje cjalde) e 20 grams di spongje, regolâ di sâl.

Splanâ la paste cul mescul, biele fine, e taiâ in cerclis di un 20 cm., taiâ ogni cercli cuntune crôs e cuei tal for a 170 grâts par un 25 minûts.

Pe creme:

3 balis di ûf

150 grams di formadi cheddar scozês (jo tal supermarcjât lu ai cjatât nome irlandês, ma almancul nol jere inglês ;))

100 ml di whisky scozês

pevar

Meti lis balis di ûf tun contignidôr che dopo al puedi lâ a bagn marie, sbatilis.

Gratâ il formadi e zontâlu aes balis di ûf.

Zontâ il whisky e messedâ dut cueìnt a bagn marie, simpri messedant, fin che nol devente dut come une creme. Fâ disfredâ messedant ogni pôc.

Servî cu cualchi gran di pevar neri pestât grues e spolverât parsore.

Note: i oatcakes a son galetis tipichis scozesis, la creme invezit no je une ricete tipiche (o almancul no che jo o sepi), ma mi soi ispirât a un formadi cheddar invecjât tal whisky che o vevi cerçât in Scozie.