Emigrant in patrie
Emigrazion: une des peraulis
che si lein plui dispès al Friûl, ai furlans.
Une esperience che nus à
segnât fin insot: tai ultins agns o ai let su chest argoment, o ai cjalât cun
interès e comozion i documentaris di Farcadice, e compagn o ai scoltât lis
trasmissions dal Sgarfefurlans. O ai ancje vût la fortune di viazâ fin a
Colonia Caroya, santuari de furlanetât argjentine.
Intune maniere pardabon anormâl o
soi un emigrant ancje jo, maridât cuntune foreste o fâs sù e jù tra Catalogne e
Friûl, e ancje se intune cundizion privilegjade o sai ce che a vuelin dî la
nostalgjie, i problemis di integrazion, il bon acet.
Mi sint emigrant in
Catalogne; mi sint forest cuant che o torni intun Friûl che dispès nol è cemût che mi plasarès.
E cumò o sai ancje ce che al
vûl dî vê la femine e la frute lontanis: o soi un emigrant furlan paradossâl
che al lasse la famee tal forest par cjatâ un gnûf lavôr in Friûl, un lavôr che
dopo mi permeti di tornâ a emigrâ lontan, par stâ dongje de famee. Cumò o soi un emigrant
in Patrie.
E cussì di emigrant o fâs la
mê critiche, la mê acuse: o soi solidari cui emigrants, ma no justifichi la
emigrazion, no sopuarti la retoriche, il jemplâsi la bocje di valôrs che a son
colpis, e o sai di ce che o feveli ancje su la mê piel.
Lis epopeis de emigrazion contadis
dai politics a son une bausie perfete, une ipocrisie sublimade: lis vitimis che
a deventin braùre e erois.
Cetancj erois furlans che a son lâts ator pal mont a
fâi onôr ae lôr Patrie...: e no si dîs nuie dal parcè che a son lâts vie, no si
fevele dal parcè de injustizie, no
si fevele di chei che ur àn gjavât ogni sperance di cjatâ un futûr degn te lôr tiere. Sì, i emigrants a son lis
vitimis dai Stâts che no son bogns di meti sù une economie degne, che a lassin
che pôcs prepotents a robin ce che al è di ducj. Tra dutis lis vitimis, i
emigrants a son chei che a reagjissin cuntun pocje di iniziative, almancul la
iniziative di scjampâ o di cirî di creâ inaltrò: par chel a puedin deventâ
erois, ma no puedin deventâ il svant di cui che al à la colpe de injustizie sociâl.
Invezit di celebrâ tant i
nestris erois scjampâts o vin di liberâsi dai colpevui che nus guviernin e di
cognossi e di fâsi judâ dai erois che a vegnin in Friûl de Europe dal Est, de
Afriche, de Americhe... cui nus contial la lôr epopee? Le vin sot dai voi ogni
dì, e no le viodìn.
