Pat pe Autonomie o astension (intune des sôs diviersis formis)


Si svicinin pardabon lis elezions: pai eletôrs furlans lis sieltis a somein trê, in realtât a son dôs, e diferentis di ce che a presentin i mieçs di comunicazion uficiâi.
Lis trê sieltis “utilis” presentadis dal sisteme uficiâl a son:
- votâ a centridiestre
- votâ a centriçampe
- votâ M5S
In sostance però il vôt indreçât intune cualsisei di chestis pussibilitâts al è compagn: a son agns che nissun nol è in stât di capî la diference jenfri centridiestre e centriçampe talianis, nissune des dôs no à ni i numars ni lis ideis par guviernâ e par fâ ce che i eletôrs si spietaressin, che in struc al sarès “salvâ la Italie” (e in concret salvâ i sparagns e lis prospetivis di ogni singul eletôr).
Cundut che di façade al somee une fuarce alternative, il M5S al à i stes difiets: nissune pussibilitât di guviernâ la republiche; un grum di ideis confusionadis che no puartaressin di nissune bande o che a puartaressin al disio par erôrs di calcul e par incoerence; inesperience aministrative aromai provade. Cun di plui, cemût che i jere sucedût ae Leghe, il svicinament al "podê dal Stât" al à za inviât la metamorfosi dal M5S: di moviment che al someave rivoluzionari, se al vinçarà avonde e se al rivarà a sorevivi ae sô stesse confusion, si trasformarà intune altre, gnove DC. Dut al fâs pensâ che cheste metamorfosi e sarès ancjemò plui svelte di ce che e jere stade cu la Leghe (che intant e à mot la sô pedine e si è metude te casele de ultradiestre).
Alore, in sostance, votâ cualsisei partît talian al è come astignîsi: al vûl dî delegâ il podê a candidâts che no valin nuie, che no rispuindin ni ai eletôrs, ni al teritori, ma a partîts che no àn nissune soluzion di ufrî e che a son bogns dome di gjavâsi dal confront cu la int contant une sdrume di bausiis.
Par fortune, rispiet a dutis lis variantis di astension, che in ogni câs no salvaran la Italie, ca di nô o vin il vôt pardabon util che o podìn dâ al Pat pe Autonomie: par salvâ il Friûl (e di chê strade, par ironie storiche, ancje Triest!!!).